‘దాచిపెట్టామ్.. ఇంకా చాలానే ఉన్నాయ్’ అని కార్తీకదీపం 2 సీరియల్ ప్రీ రిలీజ్ ఈవెంట్‌లో డాక్టర్ బాబు (నిరుపమ్ పరిటాల) ఏదో మాట వరుసకి అన్నారనుకుంటే.. నిజంగానే దాచిపెట్టినవి వరుసగా రివీల్ చేస్తన్నారు. గత సోమవారం నాడు కార్తీకదీపం 2 సీరియల్ సరికొత్త వెలుగులతో మళ్లీ మొదలైంది. ఇది నవ వసంతం అంటూ దీపాలను వెలిగించేశారు కార్తీక్, దీపలు.

ఇక ఆసక్తికరమైన కథనంలో.. కార్తీకదీపం బ్రాండ్ వాల్యూకి తగ్గట్టుగానే ‘కార్తీకదీపం 2’ ఇంట్రస్టింగ్‌గానే సాగుతోంది. ఒక్కో పాత్రను రివీల్ చేసుకుంటూ.. బలమైన నేపథ్యం ఉన్న కథగా.. కార్తీకదీపం 2 సీరియల్‌ని ఆసక్తికరంగా మలిచారు దర్శకుడు కాపుగంటి రాజేంద్ర.

ఇక ఇందులోని పాత్రలు పాత్రధారులు.. చాలామంది సీనియర్సే ఉండటంతో.. ఆయా పాత్రల్లో ఒదిగిపోతున్నారు. అయితే గురువారం నాటి ఎపిసోడ్‌లో ‘కార్తీకదీపం 2’ సీరియల్‌లో సడెన్ ఎంట్రీ ఇచ్చి సర్ ప్రైజ్ చేశారు బిగ్ బాస్ సీజన్ 2 విన్నర్ కౌశల్ (Kaushal Manda).

కార్తీక్ మరదలు జోత్న్న.. మిస్ హైదరాబాద్ పోటీలో విజేతగా నిలవడంతో.. ఆమెకు బహుమతి ప్రదానం చేయడానికి గెస్ట్‌గా ఎంట్రీ ఇచ్చాడు కౌశల్. అబ్బా.. మనోడి ఎంట్రీ అయితే మామూలుగా లేదు.. సూటూ బూటూ వేసి.. తన యాటిట్యూడ్‌కి తగ్గట్టుగానే.. ఫ్లైయింగ్ కిస్‌లు ఇచ్చుకుంటూ.. చేతులు ఊపి అభివాదం చేస్తూ.. తనదైన శైలిలో ఎంట్రీ ఇచ్చాడు కౌశల్. బ్యాగ్రౌండ్ మ్యూజిక్ కూడా మామూలుగా లేదు. కౌశల్‌కి ఓ రేంజ్‌లో హైప్ ఇచ్చారు.

అయితే మనోడికి సింగిల్ డైలాగ్ కూడా లేదు. మళ్లీ మైక్ ఇస్తే.. తన బిగ్ బాస్ విన్నింగ్ గురించి.. కౌశల్ ఆర్మీ గురించి చెప్తాడని దర్శకుడు ముందే జాగ్రత్త పడ్డాడో ఏమో కానీ.. కౌశల్‌కి మైక్ ఇవ్వకుండా మంచి పనే చేశారు. మొత్తానికి బిగ్ బాస్ సీజన్ 2 తరువాత.. ఆ ప్రాజెక్ట్‌లో చేస్తున్నా.. ఈ ప్రాజెక్ట్‌లో చేస్తున్నా.. అది చేస్తా.. ఇది చేస్తా అంటూ తనకి తాను ఓ రేంజ్‌లో హైప్ ఇచ్చుకున్న కౌశల్.. ఎట్టకేలకు ఇదిగో ఇలా కార్తకదీపం 2 సీరియల్‌లో డైలాగ్‌లు లేని సీన్‌లో కనిపించి.. సర్ ప్రైజ్ చేశారు.

కాగా కౌశల్‌కి బిగ్ స్క్రీన్ కంటే కూడా… బుల్లితెరపైనే ఎక్కువ క్రేజ్ ఉంది. బిగ్ బాస్‌తో అతనికి ఎంత క్రేజ్ వచ్చిందో సీజన్ 2లో చూశాం. అంతకు ముందు.. చక్రవాకం, బృందావనం, సూర్యవంశం, అగ్నిసాక్షి ఇలా చాలా సీరియల్స్‌లో నటించాడు కౌశల్. ఇక సినిమాల పరంగా చూస్తే.. తమ్ముడు, రాజకుమారుడు, బద్రి, మనసంతా నువ్వే, మిస్టర్ పర్ఫెక్ట్, దరువు ఇలా చాలా సినిమాల్లో కనిపించారు.