తన తల్లి అనుపమతో కలిసి భోజనం చేస్తాడు మను. ఏంజెల్ బలవంతంపై అంతా కలిసి సెల్ఫీ కూడా దిగుతారు. కొడుకు పక్కనే కూర్చుని సెల్ఫీకి ఫోజులు ఇస్తుంది అనుపమ. ఇక భోజనాలు వడ్డింపులు.. పొరమారితో తలపై కొట్టడాల్లాంటి నాటకీయ పరిణామాలు ముగిసిన తరువాత. ‘ఇక నేను వెళ్తాను’ అని అంటాడు మను. ఉండు మనూ.. ఇంటికి వెళ్లి ఏం చేస్తావ్ ఇక్కడే ఉండు అని అంటాడు మహేంద్ర. లేదు సార్.. ఇంటి దగ్గర మా ఓల్డీ (పెద్దమ్మ) ఒక్కతే ఉంది.. వెళ్లాలి అని అంటాడు మను.

దాంతో మహేంద్ర.. సరే వెళ్తే వెళ్లు కానీ.. నీకు ఎప్పుడు రావాలంటే అప్పుడు ఇక్కడికి రావొచ్చు.. ఎవరో ఏదో అనుకుంటారని రావడం మానేయొద్దు అని అనుపమ వైపు చూస్తాడు మహేంద్ర. ‘సరేసార్.. నేను వెళ్తాను’ అని అంటాడు మను. ‘వెళ్తాను కాదు.. వెళ్లి వస్తాను’ అని చెప్పాలంటుంది ఏంజెల్. ఇక మను.. వెళ్తూ వెళ్తూ.. వసుధార తనతో మాట్లాడాలనుకున్న విషయం గుర్తొచ్చి ఆగిపోతాడు.

మళ్లీ వెనక్కి తిరిగి వచ్చి.. ‘మేడమ్.. మీరో నాతో ఏదో మాట్లాడాలని ఫోన్ చేశారు.. ఏంటి మేడమ్ అది? అని అడుగుతాడు. ‘ఏం లేదండీ.. మొన్న కాలేజ్‌లో జరిగిన గొడవలో.. మీది ఏ తప్పూలేదని మా అందిరికీ తెలిసింది కదా.. ఇక మీరు కాలేజ్‌కి తిరిగి రావొచ్చు’ అని అంటుంది వసుధార.

ఆ మాటతో మను.. అదేంటి మేడమ్.. గెంటేయడం మీ ఇష్టమే.. స్వాగతించడం కూడా మీ ఇష్టమేనా? అని చురకలేస్తాడు. దాంతో వసుధార.. తలదించుకుంటుంది. ‘సరే మేడమ్.. మీ కాలేజ్‌ కాబట్టి.. మీరు పొమ్మన్నారు.. పోయాను. ఇప్పుడు రమ్మనగానే అంత జరిగిన తరువాత మళ్లీ ఎలా రాగలను మేడమ్? అని అడుగుతాడు మను. ‘ఎందురాలేరు.. ఇగో అడ్డొస్తుందా? అని అంటుంది వసు. ఇగో కాదు మేడమ్.. ఆత్మాభిమానం అడ్డొస్తుంది కదా.. నాకూ ఓ మనసు ఉంటుంది కదా అని కడిగిపారేస్తాడు మను.

అందుకే కదా ఆరోజు మీ మనసుని హర్ట్ చేశాననే కదా.. ఈరోజు రమ్మంటున్నది అని అంటుంది వసుధార. ‘సరే మేడమ్.. వస్తాను.. నేను మళ్లీ వచ్చినా.. మీరు అపార్ధం చేసుకోరని గ్యారంటీ ఉందా? అపార్ధం చేసుకోవడం మీకు అలవాటే కదా? అని అంటాడు మను. ‘ఇంతకీ మీరు ఏం చెప్పాలని అనుకుంటున్నారో.. సూటిగా చెప్పండి’ అని అంటుంది వసుధార. ‘నన్ను కాలేజ్‌కి రావొద్దని చెప్పింది అనుపమ మేడమ్ గారు.. ఆవిడ ఎప్పుడు ఏం చెప్పినా నేను చేస్తాను’ అని అంటాడు మను.

అంటే మేడమ్ చెప్తే వస్తారా? అని అడుగుతుంది వసుధార. ‘నేను వస్తే మేడమ్ కూడా ఇబ్బందిగా ఫీల్ అవుతారు.. ఇప్పుడు నేను కాలేజ్‌కి వచ్చే పదే పదే తప్పు చేయలేదని నిరూపించుకోవాల్సిన అవసరం నాకు లేదు మేడమ్’ అని అక్కడ నుంచి వెళ్లిపోతాడు మను. అయితే వాళ్లిద్దరి మాటల్ని చాటుగా వింటుంది అనుపమ.

మరోవైపు దేవయాని.. అనుపమ గురించే ఆలోచిస్తూ ఉంటుంది. ఇంతలో శైలేంద్ర వచ్చి.. ‘ఏం ఆలోచిస్తున్నావ్ మమ్మీ.. ఆ మను గాడు, అనుపమ గురించి క్లారిటీ వచ్చిందా? కాస్త టైం ఇవ్వమని అడిగావ్ కదా.. సరిపోయిందా? టైం.. వాళ్లిద్దరూ దూరంగా ఉండటానికి కారణం ఏంటో తెలిసిందా? అని అడుగుతాడు. హా తెలిసింది నాన్నా.. నా లెక్క ప్రకారం.. మనుకి తండ్రి ఎవరో తెలియదు. అదే వాళ్ల గొడవకి కారణం అని అంటుంది దేవయాని.

ఏంటి మమ్మీ.. ఇది నిజమా? తండ్రి ఎవరో తెలియకపోవడం ఏంటి? అని అంటాడు శైలేంద్ర. అవును నూటికి నూరు శాతం ఇదే జరిగింది. తల్లి చెప్తేనే కదా.. తండ్రి ఎవరో తెలిసేది. ఆ అనుపమ మనుకి తన తండ్రి గురించి చెప్పలేదు. అనుపమ తండ్రి ఎవరో చెప్పలేదంటే.. అతను ఎవరో చెప్పకూడని వ్యక్తే అయ్యి ఉంటాడు. అందుకే ఇంత రహస్యంగా ఉంచింది. మను ఎదిగిన తన తండ్రి ఎవరో తెలుసుకోవడానికి గట్టిగా నిలదీసి ఉంటాడు.. గట్టిగా గొడవ అయ్యి ఉంటుంది.. అప్పటి నుంచే ఆ ఇద్దరి మధ్య మాటలు లేవు.. ఇదే వాళ్లిద్దరూ దూరంగా ఉండటానికి అసలు కారణం’ అంటూ పూస గుచ్చినట్టు చెప్తుంది దేవయాని.